onmouseover="return overlib('
Gervisálmur Dante: Divina Comedia
er í raun lýsing leiðar frá Ítalíu til Íslands
- upp á Kjöl nærri Kerlingarfjöllum.');" onmouseout="return nd();" GÓP-fréttir: Hreiðar Jónsson frá Árkvörn í Fljótshlíð
Forsíða

Kom inn!
Hreidar Jonsson i Arkvorn

Hreiðar Jónsson

bóndi í Árkvörn í Fljótshlíð

fæddur 19. janúar 1918
dáinn 14. september 1996
jarðsettur frá Hlíðarendakirkju 21. sept. 1996


Mynd: Ragna Freyja

Kveðja Komum aðeins inn í garðinn sagði Hreiðar. Tíu ára snáði bar óttablandna virðingu fyrir garðinum hennar Höllu í Árkvörn en fylgdi þó - og alla leið að rifsberjarunnunum sem sólskríkjurnar voru svo iðnar við að tína berin úr. Og í þessari rifsberjaveislu upplýstist að aldursmunur veislugestanna var meiri en tuttugu ár. Dagar og vikur samkynnanna urðu að mánuðum og sumrum og stundum að fáeinum vetrardögum. Hreiðar var löngu orðin meginstoð þess búskapar sem þau Páll og Halla ráku í Árkvörn. Hann var líka ótrúlega næmur, glettinn og skilningsríkur á hug okkar, barnanna, og umgekkst okkur með umhyggju og virðingu - og það var eins og hann ætti sjálfur yngri börnin sem skoppuðu til hans frá Eyvindarmúla.

Þegar þessi fyrrum snáði lítur til baka rís minningin um Hreiðar upp úr eins og um kært foreldri á tímabili þegar það skipti verulegu máli. Minningar þyrpast að. Dagleg samskipti og einstakir viðburðir. Að morgni í heiðinni þegar kýrnar ekki finnast birtist Hreiðar - Það virðast vera för innyfir Múlann. Fjórtán ára er hann ríðandi í för inn á Þórsmörk með Hreiðari - Nú finnur þú fyrir okkur vöðin inn yfir vötnin, - þið strákarnir nýbúnir að fara þau, - og hélt þó auðvitað öllu í öruggri hendi. Sautján árum seinna (í september 1969) eru þeir fyrstir til að aka frá Jökulheimum, norður með Vatnajökli til Nýjadals - ásamt þremur öðrum. Alltaf sami öðlingur og sami hlýleiksmaður í samskiptum við nærstatt æskufólk.

19. 9.96 Svo kom hún Guðrún Sæmundsdóttir inn í líf hans og þá kvað þar við nýjan tón - nú var hann aldrei einn, og það var indælt að heimsækja þau í Árkvörn og að Smáratúni 8 á Selfossi þar sem þau hafa búið síðustu árin.

Það var nú síðsumars að Hreiðar fékk áfall sem varð honum að aldurtila eftir skamma sjúkralegu en fram til þess var hann eins og alltaf, íhugull, traustur og ákveðinn og mikill atgervismaður til allra átaka.

Snáðinn er löngu úr grasi vaxinn en honum er að leiðarlokum efst í huga hversu lánið lék við hann að fá að vera samtímis Hreiðari á þessari lífsins vegferð. Öllum vinum Hreiðars sendum við okkar innilegu samúðarkveðjur og alveg sérstaklega þér, Guðrún Sæmundsdóttir.

19.9.96 - Gísli Ólafur Pétursson og Ragna Freyja Karlsdóttir

21.09.1996
Þegar lít ég þunda jörð
þeysa sé ég Hreiðar
yfir hæstu himinskörð -
hefur tvo til reiðar.

Efst á þessa síðu * Forsíða