Far-Roðinn

Texti: GÓP
Lag: C. J. Rasmussen (Sjá roðann í austri ....)

Með sólbjörtum huga og syngjandi lund
þeysir sinnið í öræfaför
og í unaði gengur á fjallanna fund
- óðar fangar oss minningin ör:

:.: er merlaði skjannann
sem morgunninn fann!
Hver man ekki morguninn þann! :.:

Er roðinn úr austrinu brýtur sér braut
boðar dýrðlegan öræfadag
þegar fegurð og gleði oss fellur í skaut!
hvílík fylling í ævinnar lag!

:.: og litflóðið háa
um ljóshvolfin blá
svo ljómandi landinu á! :.:

Vér gleðjumst hér saman á gleðinnar stund
hér er glampi og sindur á brá
síðan hverfum vér aftur á fjallanna fund
megi farsældin una oss hjá!

:.: Oss framtíðin laðar
um fjall og um vað!
Vér förum á fjarlægan stað! :.: